Buxoroda yaxshilik qilib ota-bola janjalini tinchitmoqchi bo‘lgan yigit kaltaklandi

Buxoro shahar Alpomish ko‘chasida yashovchi 36 yoshli L.O‘ otasi L.H bilan janjallashib turganida janjalni oldini olish va fuqarolik burchini bajarish maqsadida kelgan, shu ko‘chada yashovchi 20 yoshli X.X.ni urib, o‘rtacha og‘irlikdagi tan jarahati yetkazgan.

Buxoro viloyati IIB xabariga ko‘ra, L.O‘.ga nisbatan Jinoyat kodeksining 105-moddasi 2-qismi “v” bandi (O‘z fuqarolik burchini bajarmoqchi bo‘lgan shaxsga qasddan badanga o‘rtacha og‘ir shikast yetkazish) bilan jinoyat ishi qo‘zg‘atilgan.

Ushbu moddada 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi belgilangan.