Minsk–Toshkent reysi bomba haqidagi xabar sabab favqulodda qo‘ndirildi

Minks—Toshkent yo‘nalishida parvoz qilayotgan Airbus A-320 samolyoti 11-aprel kuni “minalangani” haqidagi xabardan so‘ng Rossiyaning Domodedovo aeroportiga favqulodda qo‘ndi. Bu haqda “TACC” xabar qildi.

Qayd etilishicha, samolyotda portlash yuz berishi xavfi haqida anonim xabar kelib tushgan. Shu munosabat bilan samolyot Domodedovo aeroportiga qo‘ndirilgan.

Bortda portlovchi buyumlar va moddalar mavjudligi tekshirilib, tergov harakatlari olib borilgan.

Uzbekistan Airways’ning xabariga ko‘ra, samolyotning minalashtirilgani haqidagi ma’lumot tasdiqlanmagan.

Eslatib o‘tamiz, Sankt-Peterburgdan Samarqandga uchayotgan samolyot o‘zbekistonlik ayolga zudlik bilan tibbiy yordam zarurligi sabab Qozog‘istonga favqulodda qo‘ndirilgandi. Shuningdek, Moskvadan Toshkentga uchayotgan samolyot o‘layotgan yo‘lovchi sabab Qozonga qo‘nishga majbur bo‘lgandi. Urganchdan Moskvaga uchgan samolyot esa yo‘lovchilardan birining ahvoli og‘irlashgani sabab Orenburgga favqulodda qo‘ngan.