“AQSHda qonun ishlaydi, millatchilik yo‘q” — xonanda O‘lmas Ollaberganov ijodidagi tanazzul sabab Amerikaga ketgani haqida (foto)
“Kutaman” qo‘shig‘i bilan xalq mehrini qozongan ijodkor O‘lmas Ollaberganov ayni kunlarda AQSHda istiqomat qilmoqda. Xonanda “Daryo” muxbiri Nargizaxon Murodova bilan suhbatda xorijga ketishiga nima sabab bo‘lgani haqida so‘zlab berdi.
— AQSHga ketish niyatimiz avvaldan rejamizda bor edi. Chunki bundan avval ham yetti marta bu yerda kelib, bir muddat yashaganman. Hamma bilganidek AQSH imkoniyatlar, yangiliklar mamlakati. Kenja o‘g‘lim Usmonjon AQSHda o‘qish uchun uzoq vaqt tayyorlandi. U O‘zbekistonda ingliz tiliga ixtisoslashgan maktabda o‘qib, Amerikadagi universitetga hujjat topshirdi. Intilgan inson albatta, murodiga yetadi. U Virjeniya shtatidagi universitetga qabul qilinganidan so‘ng, uni yolg‘izlatib qo‘ymaslik uchun AQSHga keldim. Har bir ota-ona farzandini nufuzli universitetlarda o‘qitishni orzu qiladi. Bundan orzu menda ham bo‘lgan, shuning uchun bu yerga kelib yashashga ikkilanmadim, — deydi xonanda O‘lmas Ollaberganov.
Ayrimlarning fikricha, AQSHga ketishingizning asosiy sababi O‘zbekistonda ijod qilolmaganingiz bilan bog‘liq ekan. Bu fikrlar qanchalik asosli?
— Ijodkorlarning hayotini kuzatsangiz, ularning ko‘pchiligi bir yerda muqim yashamagan. Ijodiy ilhomlanishi uchun sayohat qilib, turar joylarini o‘zgartirib turishgan. Ijodimda ham qandaydir turg‘unlik holati bo‘ldi. AQSHga kelish ijodimga ham ijobiy ta’sir etadi, deb hisobladim. Chunki Vatanda uzoqda yashash ijodkorga o‘zgacha ilhom beradi. AQSHda yolg‘izlanib qolayotganim yo‘q, chunki bu yerda o‘zbek oilalari juda ko‘p. Ular o‘zbekona to‘y qilishadi va unga taklif etishadi. AQSHga kelishimning yana bir sabablaridan biri bu yerdagi millatdoshlarimizga o‘zbek musiqa va qo‘shiqlarini eslatib turish niyatim ham bor, — deydi O‘lmas Ollaberganov.
Suhbat davomida u ayrim ota-onalar farzandini xorijda o‘qitishdan qo‘rqishi haqidagi fikrga o‘z munosabatini bildirdi.
— Oilasida mustahkam tarbiya olgan bola hech bir mamlakatga borib, axloqiy jihatdan o‘zagrib qolmaydi. AQSHda insonlarga bolaligidan katta erkinlik beriladi. Ya’ni ularda qilib bo‘lmaydi, mumkin emas degan tushunchalar umuman yo‘q. Agar farzand bolalikdan shu yerda ulg‘aysa, axloqida qandaydir o‘zgarishlar bo‘lishi mumkin. Ammo O‘zbekistonda tug‘ilib, tarbiya olgan farzand bu yerga kelib birdan o‘zgarib qolmaydi. Intilishi bor bolani qo‘llab-quvvatlash kerak, — deydi xonanda.
Xonanda okean orti mamlakatida unga nimalar yoqqani haqidagi savolga quyidagicha javob berdi.
— Eng muhimi bu yerda qonunlar ishlaydi. Har bir fuqaro kim bo‘lishidan qat’iy nazar qonun oldida teng huquq va burchlarga ega. Bundan tashqari, bu yerda millatchilik tushunchasi yo‘q ekanligiga va u qattiq qoralanishiga ham qoyil qoldim. Odamlar xuddi bir-birini taniydigandek, samimiy munosabatda bo‘lishadi, — deydi xonanda O‘lmas Ollaberganov.
Mavzuga doir:
- “Bu yerda qolib ketishni istamasligimni ich-ichimdan his etaman”. “Sardor” serialidagi serjant Durdona Tursunboyeva AQSHda qadoqlovchi sifatida ish boshlab, brilliant sotuvchisiga aylangani haqida
- McDonald’sda idish yuvgan aktyor, Rossiyada uy qurgan xonanda. Musofirlikni boshdan kechirgan o‘zbekistonlik san’atkorlar (foto)
- AQShda yashayotgan yana bir o‘zbekistonlik aktyor Ahmad Berdimurodov hayotidagi eng katta yo‘qotish hamda orzulari haqida gapirdi
- Aktrisa Yulduz Hamidova 6 yildan beri AQShda yashayotgani hamda hozirda nima ish qilayotgani haqida so‘zlab berdi
