“Alohida metro liniyasiga ega”: Sobiq KGB razvedkachisi Putinning ehtimoliy bunkerlari haqida gapirdi
Rossiya prezidenti Vladimir Putinning yashirin bunkerlari bor. Bu haqda SSSR KGB va Rossiya Tashqi razvedka xizmatining sobiq xodimi Sergey Jirnov 25-yanvar kuni Freedom telekanali efirida gapirdi.
Jirnovning soʻzlariga koʻra, Rossiya prezidenti xavfsizligi uchun bir nechta maxfiy bunkerlar tayyorlangan, biroq bu obyektlarning hammasi ham uzoq vaqt qolishga moʻljallanmagan. Jirnov obyektlardan biri to‘g‘ridan to‘g‘ri Iosif Stalin davrida qurilib, Kreml ostida joylashganini aytdi. O‘sha paytda muhandislar SSSR rahbari ma’muriyatni jimgina tark etishi uchun alohida metro liniyasini qurgan, deydi u.
Rossiya Mudofaa vazirligiga tegishli yana bir maxfiy bunker — Ramenki-43 ham Moskvada joylashgani ta’kidlanadi.
“Bundan tashqari, barcha maxsus xizmatlarning bunkerlari bor, KGB va Bosh shtabda ham bir nechta obyektlar mavjud. Aslida, maxsus xizmatlarning qayerda rezidensiyasi bo‘lsa, o‘sha yerda bunkeri bor. Savol shundaki, ular uzoq vaqt davomida avtonom hayotni ta’minlash uchun qanchalik jihozlangan va chuqur? Bunday bunkerlar unchalik ko‘p emas”, — taʼkidladi Jirnov va yana bir bunker Vladimir Putin uchun maxsus Novo-Ogaryovo qishlog‘ida joylashgan prezident qarorgohida qurilganini aytdi.
2022-yil dekabr boshida Rossiyaning “Sobesednik” nashri prezident Vladimir Putin uchun butun Rossiya bo‘ylab maxfiy bunkerlar qurilgani haqida ma’lumot bergan. Shuningdek, The Mirror nashri dekabr oyida Vladimir Putin ommaviy gripp tarqalgani sababli yashirin bunkerdaligi haqida xabar bergan.
