“O‘zbekistonda TikTok yomon narsalarni ko‘rsatmaydi”. Qirg‘izistonda deputatlar ijtimoiy tarmoqni nazorat qilishga chaqirdi

Qirg‘izistonda deputat Shaylobek Atazov Jo‘qorg‘u Keneshda TikTok ijtimoiy tarmog‘i yoshlar mafkurasini yomon tomonga o‘zgartirayotganini aytib, Madaniyat vazirligiga bu borada ish olib borish va chora ko‘rishga chaqirdi. Bu haqda Zakon.kz xabar berdi.

Deputat TikTok yoshlarga qanday ta’sir qilishi masalasini o‘rganish zarurligini ta’kidladi.

“TikTok yoshlarga qanday ta’sir qilishini tekshirishni o‘rganish bo‘yicha ko‘rsatma bering. Bizda milliy kampaniya bo‘lishi kerak. Boshqa mamlakatlarda, masalan, O‘zbekiston va Tojikistonda TikTok yomon narsalarni ko‘rsatmaydi", — dedi Atazov.

Uning nutqini deputat Taalaybek Masabirov ham qo‘llab-quvvatladi.

“Albatta, nazoratga olish kerak. TikTokdagi ba’zi narsalarga tomosha qilish ham xavfli, bolalarimiz esa hammasini tomosha qiladi. Bizda bolalarni sportga, urf-odatlarimizga, madaniyatimizga targ‘ib qilish mafkurasi bo‘lishi kerak. Farzandlarim nima tomosha qilayotganini doim nazorat qilaman. Avvaliga bunday narsa yo'q edi, lekin endi ular boshlariga kiyim kiyib tasvirga tushmoqda. Bizning mentalitetimizga to‘g‘ri kelmaydigan videolar ko‘p”, — dedi Masabirov va ijtimoiy tarmoq qo‘shni mamlakatlarda taqiqlanganini aytdi.

Avval ham Qirg‘izistonda deputat TikTok’ni bloklashni taklif qilgandi. U tarmoqda narkomaniya, spirtli ichimlik reklama qilinishini aytib, tanalar ham ko‘rsatilishini ta’kidlagan. Shuningdek, deputat qirg‘iz mentalitetiga to‘g‘ri kelmaydigan narsalarni e’lon qilinishini qo‘shimcha qilgan.

Mavzuga doir:

• AQSHda talabalarga TikTok’dan foydalanish taqiqlanmoqda
• Qozog‘istonda TikTok’dagi o‘yin tufayli bolalar o‘z joniga qasd qilayotgani haqida xabarlar tarqaldi