Ukraina Niderlandiyaga F-16 qiruvchilari uchun rasmiy so‘rov yubordi

Ukraina F-16 qiruvchilarini olish bo‘yicha Niderlandiyaga rasmiy so‘rov bilan chiqdi. Buni Niderlandiya mudofaa vaziri Kaysa Ollengren tasdiqladi.

Ollengrenning so‘zlariga ko‘ra, bu talabni bajarish oson emas. Samolyot AQSHning mudofaa tizimi bo‘lib, shuning uchun avval AQSH hukumatidan ruxsat olish kerak.

“Biz F-16 berilishini amerikaliklar va boshqa ittifoqchilar bilan muhokama qilishimiz kerak. Va buning oqibatlarini ham jiddiy ko‘rib chiqishimiz kerak, bu bir kechada amalga oshadigan ish emas. Bu borada halol bo‘lishimiz kerak”, — dedi vazir.

Shuningdek, Ukraina armiyasi qiruvchilardan foydalanishidan oldin askarlar tegishli tayyorgarlikdan o‘tishi kerakligi qayd etilgan.

Niderlandiya mudofaa vaziri uzoq istiqbolda Ukraina F-16 lardan foydalaniladigan davlatlardan biriga aylanishini inkor qilmadi.

“Nima bo‘lganda ham mamlakat endi hech qachon avvalgidek rus qiruvchilarini sotib ololmaydi”, — dedi u.

Bunga qadar Niderlandiya bosh vaziri Mark Ryutte Ukrainaning F-16 qiruvchilarini olish boʻyicha soʻrovini koʻrib chiqishga tayyorligini, biroq hozircha bunday soʻrov kelib tushmaganini aytgan edi.

Avvalroq The New York Times gazetasi AQSH uchinchi davlatlarga Amerikaning F-16 qiruvchi samolyotlarini Ukrainaga topshirishga ruxsat berishi mumkinligi haqida yozgandi. Katta ehtimol bilan Ukraina Daniya yoki Niderlandiyadan F-16 qiruvchilarini oladi, deydi The New York Times gazetasining Yevropa va Amerika rasmiylari orasidan anonim suhbatdoshlari. Ularning aytishicha, xususan, Niderlandiya ixtiyorida 40 ga yaqin F-16 samolyotlari mavjud. 

“Bu haqda gapirayotgan boshqa davlatlar ham bor. Ular taklif bilan chiqsagina, biz muzokaralar olib boramiz, deb o‘ylayman”, — dedi AQSH Mudofaa vazirligidagi Politico manbasi. Uning ta’kidlashicha, Pentagon samolyotlar yetkazib berilishiga e’tiroz bildirmaydi, aksincha “buni ustuvor qo‘yishda davom etadi”.