Dubaydan Dushanbega uchayotgan samolyot Samarqandga qo‘nishga majbur bo‘ldi 

Dubaydan Tojikistonning poytaxti Dushanbe shahriga uchayotgan samolyot 15-fevral kuni Samarqandga qo‘nishga majbur bo‘ldi. Bu haqda Uzbekistan Airports axborot xizmati xabar berdi. 

Xabarga ko‘ra, Flydubai FZ793 reysi qalin tuman sabab ko‘rishning yomonlashuvi tufayli Dushanbe aeroportiga qo‘na olmadi va Samarqand xalqaro aeroportidagi muqobil aerodromga yo‘naltirildi. 

Bortida 141 yo‘lovchi bo‘lgan samolyot mahalliy vaqt bilan soat 03:01da Samarqand aeroportiga qo‘ndi. Yo‘lovchilar va ekipaj esa mehmonxonaga joylashtirildi.

Maʼlum qilinishicha, samolyot yo‘lovchilari bilan 16-fevral kuni Samarqand—Dushanbe yo‘nalishida parvoz qilishi rejalashtirilgan.