Isroil armiyasi Nablusga bostirib kirib, 10 nafar falastinlikni o‘ldirdi (foto)
Isroil armiyasi bosib olingan G‘arbiy Sohildagi Nablusga uyushtirgan reydda kamida 10 nafar falastinlikni, jumladan 72 yoshli erkak va 14 yoshli bolani o‘ldirdi. Bu haqda Al Jazeera xabar berdi.
Falastin sog‘liqni saqlash vazirligi Isroil harbiylari tomonidan kamida 102 kishi yaralangani, jumladan, 82 kishi o‘qqa tutilganini ma’lum qildi. Ulardan olti nafarining ahvoli og‘ir. Isroil armiyasi 22-fevral kuni mahalliy vaqt bilan soat 10 da o‘nlab zirhli texnika va maxsus kuchlar bilan Nablusga bostirib kirgan.
Shundan keyin keng ko‘lamli qarama-qarshiliklar boshlangan. Askarlar qidiruvda bo‘lgan ikki falastinlik jangchi Hossam Isleyem va Muhammad Abdulg‘oniy tomonidan egallab olingan uyni qurshab olgan, ularning ikkalasi ham o‘ldirilgan.
2023-yil boshidan beri Isroil kuchlari tomonidan o‘ldirilgan falastinliklar soni ishg‘ol qilingan hududlarda 61 kishiga yetdi, ulardan 13 nafari bolalardir.
“Biz ishg‘olchilarning Nablusga bostirib kirishini qoralaymiz va xalqimizga qarshi davom etayotgan hujumlarni to‘xtatishga chaqiramiz”, — dedi Falastin prezidenti Mahmud Abbosning matbuot kotibi Nabil Abu Rudeyne.
