Ilon Mask O‘zbekistonda Starlink internetini ishga tushirishni noma’lum muddatga kechiktirdi

Amerikalik milliarder Ilon Maskga tegishli SpaceX kompaniyasining Starlink sun’iy yo‘ldosh internet xizmati xaritasida O‘zbekiston, Qozog‘iston, Tojikiston va Turkmanistonda “xizmatni yo‘lga qo‘yish sanasi hozircha noma’lum” ekani ko‘rsatilgan.

2022-yil may oyida Markaziy Osiyoning beshta davlatida yuqori tezlikdagi keng polosali internetga ulanishni 2023-yilga qadar yo‘lga qo‘yish rejalashtirilgani ma’lum qilingandi. Interaktiv xaritaga qaraganda, bu rejalar faqat Qirg‘iziston uchun saqlanib qolgan.

Starlink terminallari odam borishi qiyin bo‘lgan joylarda ham internetga kirishni ta’minlay oladi. 2022-yil dekabrda Starlink xizmatidan foydalanuvchilarning umumiy soni 1 million kishiga yetdi. SpaceX veb-saytiga ko‘ra, Starlink orqali internetga ulanish tezligi 100 dan 200 megabayt / sekundgacha yetadi.

Avvalroq Mask SpaceX kompaniyasi Turkiyaga zilziladan keyin yordam ko‘rsatish uchun Starlink terminallarini yuborishga tayyorligini ma’lum qilgandi. Uning tushuntirishicha, Starlink hozircha Turkiya hukumatidan terminallar yuborishga ruxsat olmagan.

Yanvar oyi oxirida Nigeriya Afrika davlatlaridan birinchi bo‘lib Starlink tizimlaridan foydalanish imkoniyatiga ega bo‘ldi.