O‘zbekiston va Saudiya Arabistoni o‘rtasida xodimlarni ishga qabul qilish bo‘yicha bitim tasdiqlandi
O‘zbekiston bilan Saudiya Arabistoni hukumatlari o‘rtasida xodimlarni ishga qabul qilish bo‘yicha mehnat sohasidagi hamkorlik to‘g‘risidagi bitim tasdiqlandi. Prezident bu boradagi tegishli qarorni imzoladi.
Kambag‘allikni qisqartirish va bandlik vazirligi ushbu xalqaro shartnomani amalga oshirish yuzasidan masʼul vakolatli organ etib belgilangan.
Tashki ishlar vazirligi O‘zbekiston tomonidan mazkur xalqaro shartnomaning kuchga kirishi uchun zarur bo‘lgan davlat ichki tartib-taomillari bajarilgani hamda uni amalga oshirish uchun masʼul bo‘lgan vakolatli organ belgilangani to‘g‘risida Saudiya Arabistoni tomoniga tegishli bildirishnoma yuboradi.
Vazirlar Mahkamasi hamda tegishli vazirlik va idora rahbarlari mazkur xalqaro shartnoma kuchga kirganidan so‘ng uning qoidalari bajarilishi ustidan belgilangan tartibda nazoratni taʼminlaydi.
Shavkat Mirziyoyevning 2022-yil avgust oyida Saudiya Arabistoniga amalga oshirgan davlat tashrifi doirasida umumiy qiymati 14,8 milliard dollarga teng 15 ta hujjat imzolangan. Shuningdek, O‘zbekiston prezidenti dekabr oyida Saudiya Arabistoni podshohligi investitsiyalar vaziri Holid al-Falih boshchiligidagi delegatsiyani qabul qilgandi.
