Baxmutdagi jangda rus armiyasining yo‘qotishlari Ukrainaning yo‘qotishlaridan bir necha baravar ko‘p — CNN

Donetsk viloyatidagi Baxmut shahri uchun kechayotgan janglarda Rossiya harbiylari ukrainalik himoyachilarga qaraganda besh baravar ko‘p askarini yo‘qotdi. Bu haqda CNN NATOdagi manbalariga tayanib xabar berdi.

Xususan, agentlik suhbatdoshining aytishicha, Baxmut hududida halok bo‘lgan har bir ukrainalik askarga kamida besh nafar halok bo‘lgan rus askari to‘g‘ri keladi.

NATO mulozimining ta’kidlashicha, beshga bir nisbati razvedka ma’lumotlariga asoslangan bahodir. Uning qo‘shimcha qilishicha, Ukraina ham shaharni himoya qilishda katta yo‘qotishlarga duchor bo‘lmoqda.

Avvalroq Ukraina prezidentining iqtisodiy masalalar bo‘yicha maslahatchisi Aleksandr Rodnyanskiyning CNN telekanaliga bergan intervyusida Baxmut shahridan ukrainalik harbiylar “strategik chekinish”i mumkinligini aytgandi.

Ukraina prezidenti Vladimir Zelenskiy esa harbiy amaldorlar bilan uchrashib, Baxmutda ukrain armiyasi pozitsiyasini mustahkamlash haqida gapirgan. Buning fonida Zelenskiy va general Valeriy Zalujniy o‘rtasida Baxmut borasida kelishmovchilik yuzaga kelgani xabar qilindi. Jumladan, general Baxmutdan erta chekinish borasida gapirgan.

Rossiya armiyasining e’tibori Donetsk va yaqin atrofdagi qishloqlarga qaratilgan bo‘lib, Moskva Baxmutdagi qarshilikni yakunlash uchun u yerda katta resurslarini to‘plagan.