Yevropa Ittifoqi mamlakatlari Ukrainaga 2 mlrd yevrolik o‘q-dori yetkazib berish rejasini kelishib oldi — OAV
Yevropa Ittifoqi mamlakatlari tashqi ishlar vazirlari YI tashqi ishlar va xavfsizlik siyosati bo‘yicha oliy vakili Jozep Borrelning Ukrainaga 2 milliard yevrolik o‘q-dori yetkazib berish rejasini ma’qulladi, deb xabar bermoqda AFP diplomatik manbalarga tayanib.
Nashrga ko‘ra, yevropalik vazirlar Ukrainaga kamida 1 millionta o‘q-dori yetkazib berish va YI davlatlarining zaxiralarini to‘ldirish bo‘yicha qaror qabul qilgan.
DPA agentligining YIdagi diplomatik manbalariga tayanib xabar berishicha, ittifoq davlatlari kelgusi 12 oy ichida Kiyevga 1 millionta yangi artilleriya snaryadlarini yetkazib berishni rejalashtirmoqda.
Unga ko‘ra, Yevropa Ittifoqi Kiyevga o‘q-dorilarni xarid qilish va yetkazib berish uchun Yevropa tinchlik jamg‘armasidan 2 milliard yevro ajratish bo‘yicha Borrel rejasini ma’qullagan. Xususan, 1 milliard yevro Ukrainaga o‘z zaxiralaridan tezda snaryadlar yetkazib bera oladigan davlatlarga kompensatsiya sifatida, yana 1 milliard yevro esa o‘q-dorilarni sotib olish bo‘yicha qo‘shma loyihalarga yo‘naltiriladi.
Yevropa tinchlik jamg‘armasi mablag‘lari Yevropa Ittifoqi mamlakatlariga Ukrainaga bergan qurollari uchun kompensatsiya sifatida ajratiladi. Borrelning so‘zlariga ko‘ra, Bryussel jamg‘armadan Kiyevga berilgan qurol va o‘q-dorilar narxining 40 foizini to‘lab beradi.
