“Buni fuqarolik jamiyati va faollarning g‘alabasi deb bilaman”. Saida Mirziyoyeva ayollar huquqlari bo‘yicha qonunchilikka kiritilgan o‘zgartirishlar haqida
Oliy Majlis Qonunchilik palatasi tomonidan O‘zbekiston Respublikasi Jinoyat va Maʼmuriy javobgarlik kodekslariga ayollar hamda voyaga yetmaganlarni zo‘ravonlikdan himoya qilish bo‘yicha o‘zgartirishlar to‘plami qabul qilindi. Saida Mirziyoyeva mazkur to‘plam qabul qilingani bo‘yicha munosabat bildirdi.
Qonun loyihasining asosi Senat huzurida tashkil etilgan faollar va ekspertlardan iborat ishchi guruhi tomonidan ishlab chiqilgan bo‘lib, ular loyihaning eng so‘ngi nuqtasiga qadar Qonunga kiritilayotgan o‘zgartirishlarni yoqlab himoya qildi. Xususan, oiladagi zo‘ravonlik jinoiy huquqbuzarliklar turkumiga o‘tkazildi, iqtisodiy va psixologik zo‘ravonlik, shuningdek, voyaga yetmaganlarga nisbatan zo‘ravonlik uchun jazo kuchaytirildi. Saida Mirziyoyeva bu nafaqat O‘zbekiston ayollarining, balki barcha tafakkurli, ilg‘or insonlarning g‘alabasi ekanini taʼkidladi.
“Buni fuqarolik jamiyati va faollarning g‘alabasi deb bilaman. Sog‘lom fikr va adolatning g‘alabasi. Biz ushbu muvaffaqiyatlar uchun uzoq va mashaqqatli harakatlarni amalga oshirdik, lekin qonunchiligimizda bu kabi o‘zgartirishlar zamon talablariga xos va insonparvarlik uchun o‘ta ahamiyatli ekanligini birgalikda isbotlay oldik. Oldinda bajarishimiz lozim bo‘lgan ishlar juda ko‘p, biroq muvaffaqiyat doimo ilhomlantiradi. Ushbu o‘zgartirishlarni qo‘llab-quvvatlagan, hujjatlar ustida ish olib borgan va bu g‘oyalarni jamiyatimizda targ‘ib qilgan barchaga minnatdorchilik bildiraman. Bu nafaqat O‘zbekiston ayollarining, balki barcha tafakkurli, ilg‘or insonlarning g‘alabasi”, deb yozadi Saida Mirziyoyeva.
