Pompeo Rossiya va Xitoy yaqinlashuvini Baydenning “strategik xatosi” deb atadi
AQSH prezidenti Jo Bayden ma’muriyati Rossiya va Xitoyning yaqinlashishiga imkon berib, strategik xatoga yo‘l qo‘ydi. Bu haqda Markaziy razvedka boshqarmasining sobiq rahbari va AQSH sobiq davlat kotibi Mayk Pompeo Fox News’ga bergan intervyusida gapirdi.
Siyosatchi Oq uyning XXR raisi Si Szinpinning Moskvaga tashrifini ahamiyatsiz hodisa sifatida ko‘rsatishga urinishlarini “katta strategik xato” deb baholadi.
“Bayden ma’muriyati muvaffaqiyatsizlikka uchradi, ular rossiyaliklar va xitoyliklarning birlashishiga ruxsat berdi, bu esa AQSH va har bir fuqaro uchun katta xavf tug‘diradi”, — dedi Pompeo.
Birlashgan Millatlar Tashkiloti Xavfsizlik Kengashining ikki doimiy a’zosi “AQSHga qarshi birlashgani” Vashington uchun salbiy oqibatlarga olib keladi, deya xulosa qildi Pompeo.
Si Szinpin 20-mart kuni rasmiy tashrif bilan Moskvaga keldi. Siyosatchi Rossiya bosh vaziri Mixail Mishustin bilan muzokaralar olib bordi va davlat rahbari Vladimir Putin bilan ikki marta uchrashdi. Siyosatchilar Ukrainadagi mojaroni tartibga solishni, 2024-yilda Rossiyada bo‘lib o‘tadigan prezidentlik saylovlarini muhokama qilib, “Sibir qudrati-2” gaz quvurini qurish bo‘yicha kelishuvning asosiy parametrlarini kelishib oldi. Muzokaralar yakunida Putin va Si Szinpin 2030-yilgacha iqtisodiy hamkorlikning asosiy yo‘nalishlarini rivojlantirish rejasini imzoladi.
