O‘zbekistonda 2023-yilda o‘qituvchilar majburiy attestatsiyaga jalb etilmaydi
O‘zbekistonda 2023-yilda o‘qituvchilar majburiy attestatsiyaga jalb etilmaydi. Bu haqda Maktabgacha va maktab ta’limi vazirligi axborot xizmati xabar berdi.
Ma’lum qilinishicha, vazirlik tomonidan ta’lim tashkilotlarida faoliyat yuritayotgan pedagog kadrlarni attestatsiyadan o‘tkazish va malaka toifalari berish bo‘yicha yangi tizim ishlab chiqilib, 2024-yil 1-yanvardan boshlab davlat maktabgacha, umumiy o‘rta va maktabdan tashqari ta’lim tashkilotlari pedagog kadrlariga malaka toifasini berishning yangi tartibi joriy qilinadi.
Yuqoridagilarni inobatga olib, yangi tartib joriy etilgunga qadar 2023-yilda navbatdagi majburiy attestatsiyaga jalb qilinishi kerak bo‘lgan pedagoglarning amaldagi malaka toifalari to‘g‘risidagi sertifikatlarining amal qilish muddati navbatdagi attestatsiya tashkil qilingunga qadar uzaytiriladi.
