Isroil politsiyasi Al-Aqso masjidi yonida falastinlik yigitni otib tashladi

Isroil politsiyasi 31-mart kuni Quddusdagi Al-Aqso masjidi yonida falastinlik yigitni otib o‘ldirdi, deb xabar bermoqda ABC News. Politsiyaning aytishicha, o‘ldirilgan yigit 26 yoshda va Isroil janubidagi arab qishlog‘idan bo‘lgan.

Hodisaga guvoh falastinlik dindorlarning aytishicha, Al-Aqso darvozasi yaqinida Isroil kuchlari masjidga kirishga uringan ayolga zo‘ravonlik qilgach, yigit ular bilan janjallashgan. Isroil politsiyasi uni otib tashlagan. Guvohlarning aytishicha, unga kamida 10 marta o‘q uzishgan.

Isroil tomoni esa politsiya yigitni Al-Aqso masjidi oldida so‘roq qilish uchun to‘xtatgani, yigit uning qurolini tortib olishga uringanini aytmoqda. Shundan so‘ng u “zararsizlantirish uchun” otib tashlangan. 

Shu kuni 200 000 dan ortiq falastinliklar juma namozini o‘qish uchun yig‘ilgan edi, marosim Isroil politsiyasi bilan to‘qnashuvlarsiz yakunlangan.

2022-bahoridan beri Isroil va Falastin o‘rtasidagi mojarolar darajasi yana keskinlashgan. Associated Press agentligiga ko‘ra, 2023-yilda 86 nafar falastinlik Isroil kuchlari tomonidan o‘qqa tutilishi oqibatida halok bo‘lgan. Xuddi shu davrda Falastin hujumlarida 15 nafar isroillik halok bo‘lgan.