Buxoroda davlatga 2,66 mlrd so‘mlik zarar keltirgan noqonuniy mayning ferma aniqlandi
IIV Tezkor-qidiruv departamenti hamda hududiy ichki ishlar organlarining Tezkor-qidiruv xizmatlari tomonidan energiya resurslarini talon-toroj qilish bilan bog‘liq holatlarga chek qo‘yilmoqda.
Xususan, Buxoro viloyati IIB Tezkor-qidiruv xizmati tomonidan hamkorlikdagi tezkor tadbir o‘tkazilgan. Tadbir davomida Buxoro shahar Sherbudin ko‘chasida yashovchi shaxsning xonadonida noqonuniy mayning fermasi tashkil etilgani aniqlangan.
Xonadonda 14 dona mayning qurilmasi yuqori kuchlanishli kabel yordamida ishlatib kelingan. Buxoro viloyati elektr tarmoqlari korxonasining qayd etishicha, xonadon sohibi salkam 2,66 milliard so‘m miqdorida zarar yetkazgan.
Mazkur holat yuzasidan tergovga qadar tekshiruv harakatlari olib borilmoqda.
Shuningdek, Namangan shahar “Yuqori Rovuston” mahallasi hududida joylashgan temir eritish va metall mahsulotlari ishlab chiqarish sexi elektr hisoblagich rasmiylashtirmasdan, elektr energiyasidan noqonuniy foydalanib kelgan. Mazkur sex davlat budjetiga 1,6 milliard so‘mdan ziyod moddiy zarar yetkazilgan.
Holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilgan.
Toshkent viloyatida o‘tkazilgan tezkor tadbirda esa Ohangaron shahrida joylashgan ko‘p tarmoqli xususiy korxonasida ham noqonuniy holatga chek qo‘yilgan. Tashkilot tomonidan yuqori kuchlanishli elektr tarmog‘iga ulanib olib, davlat budjetiga 635,4 million so‘m zarar yetkazilgan.
