Andijonda uch tup chinorning noqonuniy kesilishi yuzasidan jinoiy ish qo‘zg‘atildi
Andijon viloyati Izboskan tumanida uch tup chinor daraxtini hech qanday ruxsatnomasiz kesgan fuqarolarga nisbatan jinoiy ish qo‘zg‘atildi. Bu haqda “Daryo”ga Tabiat resurslari vazirligi viloyat boshqarmasi axborot xizmati xabar berdi.
Taʼkidlanishicha, joriy yilning 5-aprel kuni ijtimoiy tarmoqlarda Izboskan tumani “Oybek” mahallasida 50-60 yillik daraxtlar kesib tashlangani haqida xabarlar tarqalgan. Ushbu xabarlar asosida Tabiat resurslari vazirligi viloyat boshqarmasi tomonidan tuzilgan ishchi guruh holat yuzasidan o‘rganish ishlarini olib borgan.
O‘rganish davomida 2022-yil 4-aprel kuni Izboskan tuman “Oybek” mahallasi “Milliy qadriyat” ko‘chasida joylashgan uch dona (g‘arb) chinor daraxti fuqarolar A.A., I.M. hamda M.T.lar tomonidan hech qanday tegishli ruxsatnomasiz noqonuniy ravishda kesib yuborilgani aniqlangan.
Surishtiruv ishlari natijasida huquqbuzarlar kesilgan chinorlarni Namangan viloyati, Uychi tumanida joylashgan yog‘ochni qayta ishlash sexiga olib borib sotgani aniqlanib, ushbu holat yuzasidan tegishli hujjatlar rasmiylashtirilgan.
Kesilgan daraxtlar tufayli o‘simlik dunyosiga yetkazilgan zarar 131 million 400 ming so‘m hisoblangan. Ushbu holatni qonunan ko‘rib chiqish uchun tegishli hujjatlar tuman prokuraturasiga taqdim etilgan.
Holat yuzasidan fuqarolarga nisbatan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan jinoyat ishi qo‘zg‘atilgan.
