Zarafshonda 25 tup daraxt ruxsatsiz ko‘chirilgani aniqlandi
Navoiy viloyati Zarafshon shahrida 25 tup daraxt ruxsatsiz ko‘chirilgani aniqlandi. Bu haqda Tabiat resurslari vazirligi Navoiy viloyati boshqarmasi axborot xizmati xabar berdi.
Ma’lum bo‘lishicha, tumanning “Bahor” mahallasida 9 tup ko‘p yillik daraxtlar va 16 tup kuz mavsumida ekilgan tut ko‘chatlari noqonuniy ravishda tegishli ruxsat olinmasdan ko‘chirilgani, shuningdek, shu yerdagi 4 tup qayrag‘och daraxtlari ko‘chirish paytida o‘sishdan to‘xtaydigan darajada shikast yetkazilgani aniqlandi.
Ushbu holat yuzasidan fuqaro O.N.ga nisbatan Ma’muriy javobgarlik to‘g‘risidagi kodeksning 79-moddasi 1-qismi bilan 3 million so‘m jarima hamda 3 million 600 ming so‘m miqdorida tabiatga yetkazilgan zarar hisoblandi. Shuningdek, o‘sishdan to‘xtagan 1 tup qayrog‘och daraxtini noqonuniy ravishda kesgani uchun fuqaro G.B.ga nisbatan kodeksning 79-moddasi 1-qismiga asosan 1 million so‘m jarima belgilandi.
