Shimoliy Koreya 4 kundan buyon Janubiy Koreyaning qo‘ng‘iroqlariga javob bermayapti
Janubiy Koreya to‘rt kundan beri Koreyalararo aloqa kanali va harbiy qaynoq liniya orqali Shimoliy Koreya bilan bog‘lana olmayapti, deb xabar berdi Yonhap axborot agentligi 10-aprel kuni ertalab.
Ikki Koreyani birlashtirish vazirligi maʼlumotlariga ko‘ra, dushanba kuni ertalab soat 9:00 da (Toshkent vaqti bilan 05:00) Shimol qo‘ng‘iroqlariga javob bermagan. Qayd etilishicha, Janubiy Koreyaning qo‘ng‘iroqlari 7-apreldan beri javobsiz qolmoqda.
O‘z navbatida, Janubiy Koreya Mudofaa vazirligi to‘rt kundan beri harbiy qaynoq liniya orqali ham Pxenyan bilan aloqa yo‘qligini ma’lum qildi.
Agentlikning eslatishicha, ikki Koreya kuniga ikki marta — 9:00 (Toshkent vaqti bilan 5:00) va 17:00 (Toshkent vaqti bilan 13:00) da telefon orqali suhbat o‘tkazar edi.
Shimolning aynan nima uchun qo‘ng‘iroqlarga javob berishdan bosh tortayotgani noma’lum. Biroq Pxenyan Seul chaqiruvlarini ataylab javobsiz qoldirayotgani va shu orqali Janubiy Koreya va AQSHning qo‘shma harbiy mashg‘ulotlariga norozilik bildirayotgani taxmin qilinmoqda.
2021-yil iyul oyida KXDR va Janubiy Koreya o‘rtasida to‘g‘ridan to‘g‘ri aloqa liniyalari tiklangan edi. Aloqalarni Pxenyan 2020-yilda uzgan. O‘sha yili iyun oyida KXDR rasmiylari Seul bilan barcha mavjud aloqa kanallari orqali muloqot to‘xtatilganini e’lon qildi. So‘ng qurolsizlantirilgan zona yaqinida joylashgan Keson sanoat parkidagi Koreyalararo aloqa idorasi portlatib yuborildi. Shimoliy Koreya rasmiylari bino ularning qarori bilan vayron qilinganini tasdiqladi.
