“Inson sha’ni, qadr-qimmati oliy qadriyatdir”. Shuhrat Abdurahmonov bilan bog‘liq xabar yuzasidan bayonot berildi

Andijon viloyati hokimligi viloyat hokimi Shuhrat Abdurahmonov haqidagi xabarlar yuzasidan rasmiy bayonot berdi.

Qayd etilishicha, internetda Shuhrat Abdurahmonov aks etgani iddao qilingan video tarqalishi ortidan, ijtimoiy tarmoqlardagi ayrim sahifalarda viloyat hokimining shaʼni va qadr-qimmatini kamsituvchi hamda obro‘sizlantiruvchi haqoratomuz postlar eʼlon qilingan.

Shu sababli insonning shaʼni va qadr-qimmatini kamsitilishiga olib keluvchi maʼlumotlar tarqatganlik holati bo‘yicha prokuratura organlariga belgilangan tartibda shikoyat arizasi yuborilgan.

“Hozirda qonunga xilof bunday maʼlumotlar tarqatgan shaxslarni aniqlash va ularga nisbatan qonun doirasida chora ko‘rish bo‘yicha amaliy ishlar olib borilmoqda”, — deyiladi bayonotda.

Hokimlikning eslatishicha, O‘zbekiston Konstitutsiyasining 13-moddasiga ko‘ra, inson, uning hayoti, erkinligi, shaʼni, qadr-qimmati va boshqa daxlsiz huquqlari oliy qadriyat hisoblanadi. Ushbu oliy qadriyatni buzganlik uchun qonunchilikda tegishli javobgarlik belgilangan.