“O‘zbekistonda o‘simlik va hayvonot dunyosiga zarar keltirganlik o‘ta og‘ir jinoyatlar kategoriyasiga o‘tkazilmoqda” — Aziz Abduhakimov
O‘zbekistonda daraxt kesganlik, unga ziyon yetkazganlik uchun jazo choralari kuchaytirilmoqda. Bu haqda 20-aprel kuni bo‘lib o‘tgan ekoaksiya avvalida tabiat resurslari vaziri Aziz Abduhakimov aytib o‘tdi, deb xabar bermoqda “Daryo” muxbiri.
Vazirning aytishicha, Qonunchilik palatasiga Ma’muriy javobgarlik to‘g‘risidagi kodeksga o‘zgartirishlar kiritish haqida taklif kiritilgan.
“Hozirda fuqarolar, tadbirkorlarimizni ogohlantirish bilan cheklanmoqdamiz. Jazo choralari ham juda kuchsiz — 300 ming so‘mdan 1,5 million so‘mgacha jarima. Albatta, bu ta’sirchan chora emas. Shuning uchun hozir biz Ma’muriy javobgarlik to‘g‘risidagi kodeksga tegishli o‘zgartirishlar kiritishni taklif etdik. Shu o‘zgarishlar kuchga kirgandan keyin moliyaviy sanksiyalar ham karrasiga ko‘payadi”, — dedi Aziz Abduhakimov.
Uning ta’kidlashicha, yangi o‘zgarishlar bilan yuridik shaxslarga ham jazo choralari qo‘llanadi.
“Ko‘pincha mansabdor shaxslarga, fuqarolarga qo‘llanadi hozirgi jazo. Lekin yuridik shaxslarga qo‘llanmayapti moliyaviy sanksiyalar. Biz taklif etayotgan o‘zgarishlar qabul qilinsa, yuridik shaxslarga ham og‘ir-og‘ir sanksiyalar qo‘llanadi. Bundan tashqari, o‘simlik va hayvonot dunyosiga keltiriladigan zarar ham o‘ta og‘ir jinoyat kategoriyasiga o‘tkazilmoqda. Bu degani mas’uliyat ham, jazo ham karrasiga oshadi”, — deydi u.
Aziz Abduhakimov 1-aprel kuni bo‘lib o‘tgan tadbirda ham atrof-muhit, flora va faunani asrash maqsadida huquqbuzarlarga nisbatan katta miqdordagi jarima jazolarini qo‘llash, hattoki moliyaviy sanksiyalar e‘lon qilish masalalarini qonunchilikka kiritish takliflari ishlab chiqilayotganini aytib o‘tgan edi.
