Rossiyaning o‘ziga tegishli bo‘lgan “Su-34” samolyoti Belgorodga aviabomba tashlab yubordi (video)
Rossiyaning Su-34 harbiy samolyoti 20 aprel, payshanba kuni kechqurun Belgorod markaziy qismiga aviabomba tashlab yubordi.
“20-aprel kuni Harbiy havo kuchlariga qarashli Su-34 samolyotining Belgorod shahri uzra parvozi chog‘ida aviatsiya o‘q-dorisining g‘ayritabiiy tushishi sodir bo‘ldi. Natijada turar joy binolariga shikast yetgan, jabrlanganlar yo‘q. Hozirda tergov harakatlari olib borilmoqda”, — deyiladi Rossiya Mudofaa vazirligi xabarida.
Belgorod viloyati gubernatori Vyacheslav Gladkov o‘zining Telegram kanalida holat bo‘yicha ma’lumot bergan.
“Belgorodda favqulodda holat. Portlash sodir bo‘ldi. Dastlabki ma’lumotlarga ko‘ra, jabrlanganlar yo‘q. Markaziy ko‘chalardan birining chorrahasida radiusi 20 metrga teng ulkan o‘ra paydo bo‘ldi. Yaqin-atrofdagi turar joy binosining oynalari singan, portlash natijasida to‘xtab turgan bir nechta mashina shikastlangan va elektr uzatish liniyalari ishdan chiqqan”, — deb yozadi u.
Keyinroq gubernator ikki kishi jabrlanganini ma’lum qildi. Shuningdek, Shaladin ko‘chasidagi turar joy binosining to‘rtta kvartirasi ham vayron bo‘lgan.
