Nurafshon shahriga yangi hokim tayinlandi
Ilhom Qilichxonov Toshkent viloyatining Nurafshon shahri hokimi etib tayinlandi. Bu haqda “Daryo” manbasi xabar berdi.
Mazkur xabarni Toshkent viloyati hokimligi axborot xizmati rahbari Behzod Qobulov ham tasdiqladi.
Ilhom Qilichxonov tayinlovga qadar Qurilish va uy-joy kommunal xo‘jaligi sohasida nazorat qilish inspeksiyasi boshlig‘i o‘rinbosari vazifasida ishlagan.
Toshkent viloyati hokimi Zoir Mirzayev Nurafshon shahrida bo‘lib o‘tgan Xalq deputatlari shahar kengashida prezident tadbirkorlarga keng imkoniyat yaratayotganini, bunday paytda hokimlar ham tadbirkorlarni qo‘llab-quvvatlashi lozimligini uqtirib, “hudud hokimlarining tadbirkorga qo‘lini ko‘ksiga qo‘yib aka degani 10 ta ish o‘rni yaratiladi degani”, dedi.
Nurafshon shahri hokimlari
2019-yilda Nurafshon shahri hokimi Usmon Hakimov Olmaliq shahri hokimi etib tayinlangan edi. Ko‘p o‘tmay uning o‘rniga “Toshuyjoy LITI” aksiyadorlik jamiyati bosh direktori lavozimida faoliyat yuritgan Qahramon Hakimov tayinlangan.
2020-yilda ijtimoiy tarmoqlarda Qahramon Hakimovning tug‘ilgan kuniga atab tayyorlangani aytilgan, bir guruh yigitlar tomonidan kuylangan qo‘shiq tarqalgandi. Jo‘shib qo‘shiq aytgan yoshlar shu hokim davrida Nurafshon o‘zgacha qiyofa kasb etganini madh etgan. 2021-yil yanvar boshida u lavozimidan ozod etildi.
2021-yil yanvarida esa sobiq uy-joy kommunal xizmat ko‘rsatish vaziri Muzaffar Soliyev Nurafshon hokimi etib tayinlangandi. 2023-yilning aprel boshlarida Muzaffar Soliyev ishdan olingani ma’lum bo‘ldi. “Kun.uz” manbasiga ko‘ra, Soliyev uy-joy kommunal xo‘jalik vaziri lavozimidagi faoliyati bilan bog‘liq ish yuzasidan tergovga jalb etilgan bo‘lishi mumkin.
