Toshkentda 200 ming so‘mlik qalbaki kupyuralarni ishlab chiqarayotgan yigit ushlandi
Toshkent shahri Chilonzor tumanida 200 ming so‘mlik qalbaki kupyuralarni ishlab chiqarayotgan yigit ushlandi.
Bosh prokuratura huzuridagi departament hamda DXXning Chilonzor tumani bo‘limlari tomonidan tezkor tadbir o‘tkazilgan. Unda noqonuniy pul ishlab chiqarayotgan fuqaro ushlandi.
Ma’lum bo‘lishicha, Uchtepa tumanida yashovchi A.S. 200 ming so‘mlik qalbaki kupyuralarni tayyorlab, har birini 60 ming so‘mdan sotib kelayotgani aniqlangan.
Fuqarodan 10 dona 200 ming so‘mlik qalbaki kupyuralar, jami 31 dona A4 formatdagi qog‘ozda chop etilgan 200 ming so‘mlik kupyuralar, rangli printer va boshqa ishlab chiqarishda foydalanilgan tovar moddiy boyliklar ashyoviy dalil sifatida olingan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
