Markaziy Osiyo davlatlarining bir qismi Rossiyaga qarshi sanksiyalarga qo‘shilishi mumkin — Rossiya TIV

Markaziy Osiyoning ayrim davlatlari tavakkal qilishga tayyor emasligi va G‘arbning Rossiyaga qarshi sanksiyalariga qo‘shilishi mumkinligini namoyish qilmoqda. Bu haqda Rossiya tashqi ishlar vaziri o‘rinbosari Mixail Galuzin “Valday” xalqaro munozara klubining III Markaziy Osiyo konferensiyasida ma’lum qildi.

“Bir tomonlama iqtisodiy cheklovlarning nomaqbulligi va noqonuniyligi haqidagi pozitsiyalar o‘xshash ekaniga qaramay, Markaziy Osiyoning bir qator davlatlari tegishli tavakkalchiliklarni o‘z zimmasiga olishni istamayapti, ular G‘arbning cheklovchi choralariga amal qilishga tayyor ekanini yaqqol ko‘rsatmoqda”, — dedi vazir o‘rinbosari.

Galuzinning so‘zlariga ko‘ra, Rossiya “o‘zaro majburiyatlarga, shu jumladan Kollektiv xavfsizlik shartnomasi, Yevrosiyo iqtisodiy ittifoqi va Mustaqil Davlatlar Hamdo‘stligi tuzilmalaridagi majburiyatlarga zid bo‘lmagan holatlarning hech birida” kimgadir qanday tashqi va ichki siyosiy yo‘l tutish kerakligini uqtirmaydi. “Ishonchimiz komilki, Markaziy Osiyo poytaxtlari buni ko‘rib turibdi va tushunmoqda: Rossiya bilan aloqalarni sun’iy tarzda yo‘q qilish dong taratgan ikkilamchi sanksiyalardan ko‘ra jiddiyroq zarar keltirishi mumkin”, — deya qo‘shimcha qildi u.

Vazir o‘rinbosari Rossiya Markaziy Osiyo davlatlari bilan strategik sheriklik munosabatlarini izchil mustahkamlashga qatʼiy qaror qilganini taʼkidladi.