Uzbekistan Airways 576 ming dollarga naq 3 mln 600 ta quloqchin sotib oldi
Uzbekistan Airways aksiyadorlik jamiyati 15—31-mart kunlari boshlang‘ich qiymati 648 ming dollarlik (taxminan 7,5 milliard so‘m) tender o‘tkazgan. “Daryo” hujjatlarni tahlil qilib, lot savdosi bo‘yicha ma’lumot beradi.
Tender samolyot yo‘lovchilari uchun bir martalik quloqchinlar sotib olish maqsadida amalga oshirilgan. Texnik topshiriqqa ko‘ra, g‘olib korxona 90 kun ichida bir donasining o‘rtacha narxi 2000 so‘m bo‘lgan naq 3 million 600 mingta naushnik yetkazib berishi kerak.
Xarid savdolarida oltita firma raqobatlashdi. Ammo ulardan uchtasi tenderdan chetlatilgan, sabab: korxonalarning rahbariyatlari o‘zaro bog‘liq, affillangan.
Komissiya a’zolarining yakuniy baholariga ko‘ra, tenderni Xitoyning Guangxi Fusui Huayunuo Trading kompaniyasi yutib olgan. Shartnoma summasi — 576 ming dollar. Bundan kelib chiqadiki, Uzbekistan Airways’ga quloqchinlarning bir donasi 1800 so‘mdan tushadi.
Abduqahhor Qosimov
