DXX Toshkentda qalbaki 100 ming dollarni sotishga uringan to‘rt kishini qo‘lga oldi (video)
DXX Toshkent shahrida qalbaki 100 ming AQSH dollarini sotishga uringan shaxslarni qo‘lga oldi, deb xabar beradi O‘zA.
Qayd etilishicha, Davlat xavfsizlik xizmatining Toshkent shahar bo‘yicha boshqarmasi xodimlari tomonidan Bosh prokuratura huzuridagi departament bilan hamkorlikda Sergeli tumanida tezkor tadbir o‘tkazilgan. Tadbirda 1974-1982-yillar oralig‘ida tug‘ilgan 4 nafar fuqaro qalbaki 100 ming AQSH dollarini 70 ming dollarga sotgan vaqtlarida ashyoviy dalillar bilan ushlangan.
Shuningdek, ulardan birining yashash xonadonidan ham qalbaki 10 950 AQSH dollari tegishli tartibda rasmiylashtirib olingan.
Hozirda holat yuzasidan mazkur shaxslarga nisbatan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2-qismi “v” bandi bilan jinoyat ishi qo‘zg‘atilib, tergov harakatlari olib borilmoqda
Qalbaki pullar muomalasi
Aprel boshlarida Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
2022-yil noyabrida Namangan viloyatida qalbaki 8 300 dollarni muomalaga kiritishga uringan shaxs ushlangan edi. Dekabrda esa Namanganda MIB idorasida qalbaki 10 000 dollar yoqib yuborilgan
