Namanganda tabiiy ofatlar haqida barvaqt xabardor qiladigan 24 metrli radiolokator o‘rnatildi (foto)

Namangan viloyatining To‘raqo‘rg‘on tumanida meteorologik radiolokator o‘rnatildi. Bu haqda “Daryo” muxbiri Azizbek Abduvaliyev xabar bermoqda.

Balandligi 24 metr bo‘lgan radiolokator Finlyandiyaning Vaisala kompaniyasi mutaxassislari bilan hamkorlikda o‘rnatildi.

Qurilma 200 kilometr radiusdagi mavjud va kutilayotgan ob-havo hodisalari, jumladan, bulutlar oqimi, shamol tezligi va yo‘nalishi, yomg‘ir, do‘l, qor miqdori va davomiyligi haqida xabardor qiladi. Shuningdek, momaqaldiroq sodir bo‘lgan hududlarni meteorologik kartalarga tushirish imkoniyati mavjud.

Maʼlumotlar har 5 daqiqada yangilanadi va muntazam ravishda “O‘zgidromet”ning meteorologik lokatorlar geoportaliga uzatib beriladi.

Radiolokatorni ishga tushirish marosimida “O‘zgidromet” rahbari Sherzod Habibullayev, BMT Taraqqiyot dasturining O‘zbekistondagi doimiy vakili Matilda Dimovska, Yaponiyaning O‘zbekistondagi elchisi Xatori Takashi va Namangan viloyati hokimining o‘rinbosari Botir Nuriddinov ishtirok etdi.

Eslatib o‘tamiz, 2022-yil mart oyida xuddi shunday radiolokator Buxoro viloyatining Kogon tumanida ham o‘rnatilgandi. O‘shanda Sherzod Habibullayev O‘zbekistonda tabiiy ofatlar har yili o‘rtacha 1,4 million kishining hayotiga salbiy taʼsir ko‘rsatayotgani, yetkazilayotgan zarar esa qariyb 3 milliard dollarni tashkil etayotganini taʼkidlagandi.