Erondan Pekinga uchayotgan samolyot Toshkentga favqulodda qo‘ndi
Tehron—Pekin yo‘nalishida IRM079 reysini amalga oshirayotgan Mahan Air aviakompaniyasining samolyoti Toshkentga favqulodda uchib keldi. Bu haqda Uzbekistan Airports matbuot xizmati xabar berdi.
Qayd etilishicha, samolyot 28-may kuni mahalliy vaqt bilan soat 23:20 da Toshkent aeroportiga kelib qo‘ngan.
Qo‘nishga yurak xurujiga uchragan yo‘lovchi sabab bo‘lgan. Yo‘lovchining sog‘lig‘i yomonlashgani sababli ekipaj muqobil aerodromga o‘tishga qaror qilgan.
Aeroportga qo‘ngach, yo‘lovchi tez yordam mashinasida olib ketilgan va malakali tibbiy yordam ko‘rsatish uchun tibbiy muassasaga yotqizilgan.
Favqulodda qo‘nish bilan bog‘liq holatlar
2022-yil oktabrda Rossiya “Azimut” aviakompaniyasining Moskvadan Urganchga uchayotgan samolyoti Samaraga favqulodda qo‘ngandi. Bunga yo‘lovchilardan birining sog‘lig‘i yomonlashgani sabab bo‘lgan. 18-yanvar kuni esa “Aeroflot” kompaniyasi samolyoti Moskvadan Goaga uchayotgan vaqtida Urganchga qo‘ndirilgan edi. Fevral oxirlarida “Azimut” aviakompaniyasining Samarqand—Ufa yo‘nalishi bo‘ylab uchgan samolyoti texnik sabablarga ko‘ra “Samarqand” xalqaro aeroportiga qaytgandi.
