Buxoroda ijaradagi uyida qo‘shmachilik bilan shug‘ullangan ayol ushlandi
Buxoro shahrida ijaradagi uyida fohishaxona tashkil qilgan 32 yoshli ayol ushlandi. Bu haqda Buxoro viloyati IIB axborot xizmati xabar berdi.
Qayd etilishicha, shaharning “Gulchorbog‘” mahallasida yashovchi, 1991-yilda tug‘ilgan Y.S. ikki nafar mijozga yengil tabiatli X.G. ismli ayolni topib berib, ularning jinsiy aloqa qilishlari uchun o‘zi ijarada yashayotgan xonadonidan joy ajratib bergan. Ayol buning uchun ulardan 300 ming so‘m pul olgan.
Mazkur holat yuzasidan shahar IIO FMB tomonidan Jinoyat kodeksining 131-moddasi (qo‘shmachilik qilish yoki fohishaxona saqlash) 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Bu kabi holatlar Buxoro viloyatida bir necha bor aniqlangan. Xususan, Buxoro tumanida xonadonida 100 ming so‘mga fohishaxona tashkil qilgan 64 yoshli erkak ushlangandi. Buxoro shahri Alpomish ko‘chasida yashovchi, 1980-yilda tug‘ilgan erkak ham yashash xonadonida fuqarolarning jinsiy aloqa qilishi uchun 60 000 so‘m evaziga yetarli shart-sharoit yaratib berib, fohishaxona tashkil qilgani aniqlangani to‘g‘risida xabar berilgan edi. Bir necha kun oldin esa Buxoro shahrida fohishaxona tashkil qilish bilan bog‘liq bir nechta jinoiy holatlarga chek qo‘yilgandi.
