Farg‘onadagi tergov hibsxonasida mahbusga tan jarohati yetkazilgani haqidagi xabarlar rad etildi

Ijtimoiy tarmoqda Farg‘ona viloyatidagi 10-sonli tergov hibsxonasida sodir bo‘layotgan qonunbuzilishlar haqida murojaat tarqaldi. Viloyat prokuraturasi bunga munosabat bildirdi.

Qayd etilishicha, mazkur murojaat yuzasidan tergovga qadar tekshiruv harakatlari o‘tkazildi. Tekshiruv davomida, mahbus R.T. uning nomidan yozilgan tergov hibsxonasi xodimlari unga tan jarohat yetkazilgani haqidagi arizani o‘zi yozmagani, uni kim va nima maqsadda yozilganidan xabari yo‘qligini aytgan.

Shuningdek, unga nisbatan hibsxona xodimlari yoki boshqa shaxslar tomonidan tan jarohat yetkazilmaganini bildirib, e’lon qilingan arizani ko‘rib chiqishdan tugatishni va rad etishni so‘ragan.

Bundan tashqari, mahbus R.T. tibbiy ko‘rikdan o‘tkazilganida, tanasida tan jarohatlari va ulardan qolgan izlar aniqlanmagan.

Mazkur holat yuzasidan 3-iyun kuni Farg‘ona shahar prokuraturasi tomonidan jinoyat ishi qo‘zg‘atishni rad etish to‘g‘risida qaror qabul qilingan.