Afg‘oniston 2022-yil elektr energiyasi uchun O‘zbekistonga qancha to‘lagani ma’lum qilindi

Afg‘oniston milliy elektr kompaniyasi (Da Afghanistan Breshna Sherkat – DABS) o‘tgan yili Tojikiston, O‘zbekiston va Erondan 252 million dollarga elektr energiyasi import qilganini ma’lum qildi. Bu haqda Hasht-e Subh Daily xabar berdi.

“Breshna” kompaniyasi vakillarining aytishicha, o‘tgan yili Afg‘oniston Tojikiston, O‘zbekiston va Erondan 260 million dollardan ortiq elektr energiyasi import qilgan. “Breshna” rahbari Abdul Rahmon Rahmoniy yillik hisobotida kompaniya elektr energiyasini sotib olish uchun 2022-yilda Tojikistonga 96 million dollar, O‘zbekistonga 94 million dollar, Eronga esa 62 million dollar to‘langanini keltirgan.

Afg‘oniston elektr kompaniyasi qo‘shni davlatlardan elektr energiyasini import qilishdan tashqari, 22,3 million mahalliy elektr energiyasi ishlab chiqaruvchi kompaniyalarga to‘lagan.

Ma’lumotlarga ko‘ra, ayni paytda Afg‘onistonning elektr energiyasiga bo‘lgan ehtiyojining qariyb 75 foizi qo‘shni davlatlar hisobiga ta’minlanmoqda.