Toshkent viloyatida 5 yoshli bola kanalda oqib ketdi
Toshkent viloyatining Toshkent tumanida 5 yoshli bola kanalda oqib ketdi.
Bosh prokuratura axborot xizmati rahbari Hayot Shamsutdinovning ma’lum qilishicha, u yashash uyining old tomonidan oqib o‘tuvchi Zaxariq kanaliga ehtiyotsizligi oqibatida tushib ketib, oqib ketgan.
Hozirda bolani qidirib topish bo‘yicha barcha zarur tezkor choralar ko‘rilmoqda.
Bundan bir necha kun avval Toshkent viloyatining Yangiyo‘l shahridan oqib o‘tuvchi Jo‘nariq kanalida 16 yoshli bola cho‘kib ketgandi. Uning jasadi bir kun o’tib, 4-iyunda topilgan.
Farg‘ona viloyati Qo‘shtepa tumanida esa 25-may kuni Katta Farg‘ona kanaliga cho‘milishga borgan maktab bitiruvchilaridan biri suvdan qaytib chiqmagan. 9 kun davomida qidiruv ishlari natijasida uning jasadi 3-iyun kuni topilgan.
