Toshkentda yana yo‘lovchi elektrobusi va mashina ishtirokida YTH sodir bo‘ldi
Toshkent shahar Uchtepa tumanida yo‘lovchi elektrobusi va Lacetti ishtirokida YTH sodir bo‘ldi. Bu haqda “Toshshahartransxizmat” AJ axborot xizmati xabar berdi.
Unga ko‘ra, hodisa 8-iyun kuni soat 12:30 larda 7-Avtobus saroyi filiali tasarrufidagi, 94-sonli yo‘nalish haydovchisi avtobusni Uchtepa tumani Guliston ko‘chasi orqali “Muxlisa” va “Ahmad” bekati oralig‘ida boshqarib borayotgan vaqtda sodir bo‘lgan. Yo‘l chetidagi Lacetti haydovchisi mast holatda avtomobilni boshqarib to‘satdan yo‘lning qatnov qismiga chiqqan va elektrobusga urilgan.
Mazkur yo‘l-transport hodisasi natijasida tan jarohati olganlar yo‘q. Yutong rusumli elektrobus va Lacetti texnik shikastlangan. Hozirda ushbu yo‘l-transport hodisasi Ichki ishlar bosh boshqarmasi xodimlari tomonidan rasmiylashtirilgan.
Bu poytaxtda elektrobus bilan bog‘liq ilk holat emas. 5-iyun kuni soat 10:00 larda Yakkasaroy tumani Shota Rustaveli — Glinka ko‘chalari kesishgan chorrahada Lacetti, Malibu-2 va Yutong rusumli elektrobus ishtirokida ham YTH yuz bergan edi.
