Peskov: “Rossiya atom sanoati jahon bozorida yetakchi o‘rinni egalladi”

Rossiya prezidenti matbuot kotibi Dmitriy Peskovning fikricha, Rossiya atom sanoati kuchli raqobat sharoitida ham “o‘zining yetakchi mavqeyini” isbotlay oldi. Uning so‘zlariga ko‘ra, kelajakda ham shunday bo‘ladi.

Shu tariqa Peskov Buyuk Britaniya va AQSHning Rossiyaga atom energiyasi bozorida raqobat ko‘rsatish niyatida ekanligi haqidagi bayonotlariga izoh berdi.

“Rossiya atom sanoatining raqobatbardoshligini shakllantirish jahon bozoridagi shiddatli sharoitda yuz berdi. Aynan shu raqobat natijasida Rossiya atom sanoati yetakchi mavqeini isbotladi. Biz  yetarlicha kuchlimiz. Bizning atom sanoatimiz hamkorlikdan manfaatdor bo‘lganlarga o‘z afzalliklarini isbotlashda davom etishga tayyor”, — dedi janob Peskov jurnalistlar bilan muloqot chog‘ida.

Avvalroq “Rosatom” O‘zbekistonda birinchi atom elektr stansiyasini qurish bo‘yicha shartnoma imzolamoqchi ekanligi ma'lum qilingandi.

“Biz atom bo‘yicha madaniyati ham, qonunchiligi ham yo‘q mamlakatlarga kirib boramiz. Qolaversa, biz ularning yadroviy infratuzilmasini, qonunchiligini yaratamiz, odamlarni tayyorlaymiz”, — dedi rossiyalik amaldor Gennadiy Saxarov.