Toshkentda 50 km tezlikda harakatlanganda ham 72 km tezlik bilan jarima kelayotgani aytildi

Ijtimoiy tarmoqlarda Toshkent shahrida ayol 50 km tezlikda harakatlanganda ham 72 km tezlik bilan jarima kelayotganini aytib, murojaat bilan chiqdi. Yo‘l harakati xavfsizligi xizmati mazkur xabarlar yuzasidan tushuntirish berib, sinov o‘tkazdi. 

Xabarga ko‘ra, prezidentning tegishli farmoni hamda Vazirlar Mahkamasining qaroriga asosan 2023-yil 1-apreldan boshlab Toshkent shahri hududida mashinalarning yuqori cheklangan tezligi soatiga 60 kilometr etib belgilangan. Bu bo‘yicha yo‘l harakati qoidalarining 78-bandiga ham tegishli o‘zgartirishlar kiritilgan. 

Xodimlar tomonidan surishtiruv olib borilib, murojaat yo‘llagan fuqaro aniqlandi va qoidabuzarlik sodir etilgan joy — Yangihayot tumanining o‘zida holatga to‘liq oydinlik kiritildi. Kameraning ishlash tartibi va aniqligini tekshirish bo‘yicha sinov tashkil etildi. Sinovdan so'ng ayol adashganini tushunib yetdi. 

“Balki, o‘zim adashgandirman. Chunki Toshkent shahri deyilgan joyda 60 bo‘lishi kerak ekan, men 60 dan past keldim deb o‘ylagan ekanman. Balki, o‘zim tezlikni oshirib yuborgandirman. Men adashgan ekanman”, — deydi ayol.