O‘zbekistonda psixiatr, tibbiy psixolog, psixoterapevt hamda suisidologlar maoshiga ustama oshiriladi

O‘zbekistonda 19-iyunda imzolangan “Aholining ruhiy salomatligini muhofaza qilish xizmatini yanada rivojlantirish chora-tadbirlari to‘g‘risida”gi prezident qaroriga ko‘ra tibbiy psixolog, psixoterapevt hamda suisidologlar maoshiga ustama miqdori oshiriladi.

Hujjatga ko‘ra,  2023-yil 1-avgustdan tibbiyot muassasalarida ruhiy salomatlik bilan shug‘ullanuvchi alohida mutaxassislar faoliyati yo‘lga qo‘yiladi.

Jumladan:

• tuman (shahar) ko‘p tarmoqli markaziy poliklinikalarida Aholining sog‘lom turmush tarzini qo‘llab-quvvatlash va jismoniy faolligini oshirish markazining tuman (shahar) bo‘linmalari shtatlarini qisqartirish hisobidan — tibbiy psixolog;
• statsionar o‘ringa ega bo‘lmagan ruhiy-asab kasalliklari dispanserlari va tarkibida dispanser mavjud bo‘lgan ruhiy kasalliklar shifoxonalarida — suisidolog;
• statsionar o‘ringa ega bo‘lgan ruhiy-asab kasalliklari dispanserlari va ruhiy kasalliklar shifoxonalarida — amaldagi shtatlar doirasida qabul bo‘limi shifokori, navbatchi psixiatr, tibbiy psixolog yoki psixoterapevt shtatlari joriy etiladi.

1-iyuldan boshlab tuman (shahar) ko‘p tarmoqli markaziy poliklinikalarida faoliyat yuritayotgan psixiatr hamda psixiatriya davolash muassasalarida faoliyat yuritayotgan psixiatr, tibbiy psixolog, psixoterapevt hamda suisidologlarning lavozim maoshiga ustama miqdori 25 foizdan 50 foizga oshiriladi.