Ukrainada yarim yil ichida magistral elektr tarmoqlarining 40 foizdan ortig‘i shikastlandi
Ukrainada olti oy ichida magistral elektr tarmoqlarining 43 foizi shikastlandi. Bu haqda “Ukrenergo” milliy energetika kompaniyasi ma’lum qildi.
Kompaniya mas’ullari infratuzilma og‘ir ahvolda ekani, iste’molchilarni zaxira energiya ta’minotiga o‘tkazish imkoniyati kamayganini ta’kidladilar.
Shu munosabat bilan Ukraina aholisidan elektr jihozlarini tejamkorlik bilan ishlatish iltimos qilindi, ayniqsa, kechqurun soat 19:00 dan 22:00 gacha vaqt oralig‘ida elektr energiyasini tejash so‘ralmoqda.
Kiyev elektr tarmoqlari boshqaruvi raisi Vladimir Kudritskiy 25-may kuni resurslar yetishmasligi sababli yoz mavsumi mamlakat energetika tizimi uchun og‘ir kechishini ta’kidlagandi.
Ukraina Energetika vazirligining hisob-kitoblariga ko‘ra, 2023-yilda respublika energetika tizimini tiklash uchun 3,4 milliard dollar kerak bo‘ladi.
Ulardan 1,2 milliard dollar ma’lum resurslarni sotib olishga, qolgani – taqsimlash va qayta tiklashga, shuningdek, elektr uzatish liniyalarini yangilash uchun zarur.
