O‘zbekistonda kovid bilan kasallanganlar bilan ishlayotgan shifokorlarga ustamalar kamaytirildi
O‘zbekistonda kovid bilan kasallangan bemorlar bilan ishlayotgan shifokorlarga ustamalar to‘rt baravar kamaytirildi. Bu haqda Norma ma’lum qildi.
Qayd etilishicha, “O‘zbekiston Respublikasi Prezidentining va O‘zbekiston Respublikasi hukumatining ayrim hujjatlariga o‘zgartirishlar kiritish, shuningdek, baʼzilarini o‘z kuchini yo‘qotgan deb hisoblash to‘g‘risida”gi prezident farmoni imzolandi.
Hujjatga muvofiq, Uzmedimpeks va IT-Med MCHJlar ommaviy savdolar orqali to‘liq sotilayotgan tashkilotlar ro‘yxatidan chiqarilmoqda.
Maʼlumot uchun: muqaddam qayta tashkil etiladigan va tugatiladigan davlat korxonalarining ro‘yxatlari tasdiqlangan edi.
Koronavirus infeksiyasi bilan kasallangan bemorlar joylashgan muassasalarda faoliyat olib borayotgan tibbiyot va boshqa xodimlar hamda koronavirus infeksiyasini aniqlash laboratoriyalari xodimlariga ishlagan davri uchun maxsus ustama to‘lovi 200 dan 50 foizga tushirilmoqda.
Hujjat qonun hujjatlari maʼlumotlari milliy bazasida eʼlon qilingan va 16-iyundan kuchga kirdi.
