Hindistonda kuchli yomg‘irlar tufayli mingdan ortiq qishloq suv ostida qoldi
Hindiston shimoli-sharqiga tabiiy ofat yopirildi. Kuchli yomg‘ir va suv toshqini tufayli yarim millionga yaqin odam jabr ko‘rdi. Kamida bir kishi vafot etgan.
Mahalliy aholi chorva mollari, parrandalar va shaxsiy buyumlarini saqlab qolishga urinmoqda. Suv oqimlari yo‘lda duch kelgan hamma narsani vayron qilib ketgan.
1300 dan ortiq qishloq suv ostida qoldi. Kuchli yomg‘irlar natijasida deyarli 15 ming gektar qishloq xo‘jaligi yerlarini suv bosdi. So‘nggi 24 soatning o‘zida sel suvlari 10 ta to‘g‘ondan toshib o‘tgan. Yo‘llar va ko‘priklar buzilgan.
Mahalliy hukumat 11 ta hududda vaqtinchalik turar joy lagerlari va yordam ko‘rsatish punktlarini tashkil qildi.
Hindistonning Assam shtati so‘nggi bir hafta ichida ikki marta suv ostida qoldi. Mamlakatning shimoli-sharqida sentabrgacha davom etishi mumkin bo‘lgan musson mavsumi boshlangan.
