Shimoliy Koreya AQSHni vaziyatni yadro urushiga olib borayotganlikda aybladi

Shimoliy Koreya Janubiy Koreya va AQSHni Koreya yarimorolidagi vaziyatni “yadro urushi ostonasi”ga olib borayotganlikda ayblab, mudofaa qobiliyatini mustahkamlashda davom etishga va’da berdi. Bu haqda Yonhap yozmoqda.

KXDR Tashqi ishlar vazirligi qoshidagi Amerika tadqiqotlari instituti 26-iyun kungi hisobotida mintaqadagi harbiy keskinlikni 1950—1953-yillardagi Koreya urushi boshlanishidan oldingi kechaga qiyosladi.

“AQSHning bunday jangovar harakatlari Koreya yarimoroli va Shimoli-sharqiy Osiyodagi harbiy taranglikni kuchaytirmoqda, vaziyat juda beqaror, yadro urushi ostonasida”, — deyiladi ingliz tilida taqdim etilgan hisobotda.

Pxenyanning taʼkidlashicha, bu yil Vashington Shimoliy Koreyaning suvereniteti va xavfsizligiga nisbatan har qachongidan ko‘proq “dushmanona harakatlarni amalga oshirmoqda”. Shuningdek, yarimoroldagi urush “misli ko‘rilmagan jahon va termoyadro urushiga aylanib borayotgani”, butun dunyodagi “eng halokatli va qaytarib bo‘lmaydigan oqibatlarga” olib kelishi haqida ogohlantirildi.

Shu munosabat bilan, agar Qo‘shma Shtatlar dushmanlik siyosati va doimiy harbiy tahdiddan voz kechmasa, KXDR o‘z suverenitetini himoya qilish uchun o‘zini o‘zi mudofaa qobiliyatini mustahkamlash bo‘yicha saʼy-harakatlarini kuchaytirishda davom etadi, deyiladi xabarda.