Prigojinga Shoygu mukofot sifatida bergan pistolet qaytarildi
“Vagner” xususiy harbiy kampaniyasi asoschisi Yevgeniy Prigojinga 24-iyun kuni Sankt-Peterburg yaqinida joylashgan Shimoliy Versal qishlog‘idagi dala uyida tintuv o‘tkazish chog‘ida olib qo‘yilgan pistoleti qaytarildi. Bu haqda “Fontanka” xabar berdi.
Ma’lum qilinishicha, gap “Vagner” yetakchisiga Rossiya mudofaa vaziri Sergey Shoygu tomonidan taqdim etilgan “Glok” pistoleti haqida bormoqda.
O‘z egasiga qaytarilgan arsenallar orasida ikkita Sayga karabini, avstriyalik Steyr Mannlicher o‘qli karabini, “Arka” yarim avtomatik vintovkasi va yana bir nechta miltiq, pistolet bor. Prigojin Sankt-Peterburg va Leningrad viloyati federal xavfsizlik xizmati departamentidan qurollarini olib ketishi mumkin.
Avvalroq Prigojinga Sankt-Peterburgda tintuv chog‘ida qutilardan topilgan 10 milliard rubl ham qaytarilgandi. Prigojin bu pullar “Vagner” jangarilariga maosh to‘lash va halok bo‘lganlarning yaqinlariga tovon to‘lash uchun mo‘ljallanganini aytgandi.
