Qozog‘iston bojxonasida 24 ming litr benzinni olib chiqmoqchi bo‘lgan o‘zbekistonlik qo‘lga olindi
Qozog‘istonning Turkiston viloyatidagi “Qazig‘urt” bojxona postida 24 ming litr Ai-92 benzinining noqonuniy olib chiqib ketilishining oldi olindi. Bu haqda Davlat daromadlari qo‘mitasiga tayanib, “Kazinform” xabar berdi.
Qayd etilishicha, “Qazig‘urt” bojxona punkti xodimlari 15-iyun kuni O‘zbekistonga yo‘l olgan DAF rusumli avtomashinani to‘xtatgan. O‘zbekiston fuqarosi nazoratida bo‘lgan avtomashinada bojxona deklaratsiyasiga muvofiq yuklangan “Oksigenat” rusumli tovarning hidi shubha uyg‘otib, ko‘rikdan o‘tkazilgan.
Bojxona ko‘rigidan o‘tkazilganda, jami 24 dona plastik idishga (har biri 1 000 litrdan) benzinga o‘xshash suyuqlik solingani aniqlangan. Namunalar olinib, bojxona ilmiy-tadqiqot markaziga yuborilgan va natijada mahsulot Ai-92 benzini ekani tasdiqlangan.
Sud qaroriga ko‘ra, qoidabuzar maʼmuriy javobgarlikka tortilib, 103,5 ming tenge (2,6 million so‘m) miqdorida jarima solingan va olib qo‘yilgan tovarlar davlat foydasiga musodara qilingan. Qozog‘istonda hozirda avtotransport vositalarida benzin, dizel yoqilg‘isi va ayrim neft mahsulotlarini respublika tashqarisiga olib chiqish taqiqlangan.
2022-yilning avgust oyida Qozog‘istondan O‘zbekistonga noqonuniy olib o‘tilayotgan 2 milliard so‘mlik benzin to‘xtatib qolingandi. Shuningdek, Qozog‘istonning Pavlodar viloyatidan Tojikiston va O‘zbekistonga noqonuniy yo‘llar bilan vagonlarda benzin olib o‘tilayotgani aniqlangan edi. 2023-yilning may oyida esa Andijonda tadbirkorning 19,3 ming litr dizel va benzini talon-toroj qilingani to‘g‘risida xabar berilgandi.
