O‘zbekiston va Sloveniya o‘rtasida iqtisodiy hamkorlik to‘g‘risidagi bitim tasdiqlandi
“Xalqaro shartnomani tasdiqlash to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.
Qarorga muvofiq, O‘zbekiston hamda Sloveniya hukumatlari o‘rtasida iqtisodiy hamkorlik to‘g‘risidagi bitim tasdiqlangan. Mazkur bitim 2023-yil 8-fevral kuni Toshkent shahrida imzolangan edi.
Hujjatga muvofiq, Investitsiyalar, sanoat va savdo vazirligi ushbu xalqaro shartnomani amalga oshirishga masʼul bo‘lgan vakolatli organ etib belgilandi.
Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirganidan keyin uning qoidalari amalga oshirilishi ustidan belgilangan tartibda nazoratni taʼminlaydi.
2023-yilning yanvarida “Xalqaro shartnomani tasdiqlash to‘g‘risida”gi prezident qarori bilan O‘zbekiston va Saudiya Arabistoni podshohligi hukumati o‘rtasida bojxona ishlarida hamkorlik va o‘zaro yordam to‘g‘risidagi bitim tasdiqlangan edi. Fevral oyida esa O‘zbekiston Pokiston bilan imtiyozli savdo sohasida hamkorlik qilishi ma’lum bo‘ldi.
