Shveysariya barcha mamlakatlarni kassetali bombalardan foydalanmaslikka chaqirdi 

Shveysariya Amerika Qo‘shma Shtatlarining Ukrainaga kassetali bombalar yetkazib berishni boshlash haqidagi qarorini e’tiborga olib, dunyo davlatlarini ulardan foydalanmaslikka chaqirdi, deb ma’lum qildi mamlakat TIV matbuot kotibi Pyer-Alen Elchinger.

"Shveysariya Qo‘shma Shtatlar tomonidan qabul qilingan qarorni e’tiborga oldi. Kassetali bombalar to‘g‘risidagi konvensiyaga a’zo davlat sifatida u ushbu qurollarning taqiqlanishini qo‘llab-quvvatlaydi va barcha davlatlarni ulardan foydalanmaslikka chaqiradi. Nomutanosib hujumlar taqiqlanadi va xalqaro gumanitar huquqning jiddiy buzilishi sifatida baholanadi”, — dedi u.

AQSH prezidenti Jo Bayden 7-iyul kuni Kiyevga kassetali bombalar yetkazib berishni boshlash haqidagi qarorini e’lon qildi. Rossiya Tashqi ishlar vazirligining rasmiy vakili Mariya Zaxarovaning ta’kidlashicha, bunday harakat tinch aholi uchun xavf tug‘diradi va mojaroni uzaytirishga qaratilgan.