Shavkat Mirziyoyev bir qator tashkilot rahbarlari va ikki vazir o‘rinbosarini ishdan oldi
Shavkat Mirziyoyev videoselektor yig‘ilishida bir qator tashkilot rahbarlari va ikki vazir o‘rinbosarini ishdan oldi. Bu haqda Prezident matbuot xizmati xabar berdi.
Unga ko‘ra, bundan to‘rt yil avval “Toshkent-Samarqand”, “Toshkent-Andijon” pullik yo‘llari va “Taxtaqoracha” dovonida pullik tonnel qurish topshiriqlari berilgan. Lekin na loyiha qilish, na investor jalb qilish bo‘yicha haligacha amaliy ishlar boshlanmagan. Bugungi kunda temir yo‘lda 2,5 mingta yuk vagoni yetishmasligi, mavjud vagonlarning 3,5 mingtasi esa taʼmirtalabligiga qaramay, ularni ko‘paytirish, yo‘llarni modernizatsiya qilish uchun bor-yo‘g‘i 16 million dollar to‘g‘ridan to‘g‘ri investitsiya o‘zlashtirgan.
Shuningdek, xorijiy investitsiyalar o‘zlashtirish hajmi o‘tgan yilga nisbatan “O‘zavtosanoat”da 47 foizga, to‘qimachilikda 43 foizga, qurilish materiallarida 31 foizga kamaygan. Shu bois, investitsiyalarni jalb qilish va ularni o‘zlashtirishda sustkashlikka yo‘l qo‘yganliklari uchun suv xo‘jaligi vaziri o‘rinbosari B.Kamalov, transport vaziri o‘rinbosari A.Mo‘minov, “Suvtaʼminot” rahbari S.Saifnazarov, “Temir yo‘l” rahbari X.Xosilov va “Avtoyo‘l” rahbari A.Abduvaliyev lavozimidan ozod etildi.
“O‘zto‘qimachiliksanoati” uyushmasi raisi I.Haydarov, “Issiqlik elektr stansiyalari” AJ raisi B.Jo‘rayev, “O‘zsanoatqurilishbank” raisi S.Annaklichevga hayfsan eʼlon qilindi.
