BMT Qur’on va boshqa muqaddas kitoblarni yoqib yuborishni qoralovchi rezolyutsiya qabul qildi

BMTning Inson huquqlari kengashi Qur’on va boshqa muqaddas kitoblarni yoqib yuborishni qoralovchi rezolyutsiya qabul qildi.

“Kengash so‘nggi paytlarda ommaviy ravishda va qasddan sodir etilayotgan  Qur’oni Karimni tahqirlash harakatlarini qoralaydi va qat’iyan rad etadi hamda diniy adovat qo‘zg‘ayotgan ushbu shaxslarni davlatlarning xalqaro inson huquqlaridan kelib chiqadigan qonunlariga muvofiq javobgarlikka tortish zarurligini ta’kidlaydi”, — deyiladi hujjatda.

12 davlat — AQSH, Buyuk Britaniya, Belgiya, Kosta Rika, Chexiya, Finlyandiya, Fransiya, Germaniya, Litva, Lyuksemburg, Chernogoriya, Ruminiya mazkur rezolyutsiyaga qarshi chiqdi.

28 davlat, shu jumladan, O‘zbekiston ham BMTning bu rezolyutsiyasini yoqlab ovoz bergan.

Birlashgan Millatlar Tashkiloti davlatlarni diniy adovat va zo‘ravonlikni qo‘zg‘atuvchi harakatlar uchun javobgarlikka tortishga to‘sqinlik qilishi mumkin bo‘lgan qonunlaridagi bo‘shliqlarni aniqlab, ularni qo‘llash tizimini qayta ko‘rib chiqishga chaqirmoqda.

28-iyun kuni Stokgolmda iroqlik erkak Qur’onni yoqib yubordi. Bag‘dod Qur’onning yoqilishini qoralab, “salbiy” oqibatlaridan ogohlantirdi va bu aksiyaning “so‘z erkinligiga hech qanday aloqasi yo‘qligini” ta’kidladi. Turkiya hodisani “islomga qarshi harakat” deb atadi, Marokash esa o‘z elchisini mamlakatdan chaqirib olishga qaror qildi.