Xitoyning O‘zbekistondagi yangi elchisi tayinlandi
Xitoy elchixonasi rasmiy saytida mamlakatning O‘zbekistondagi favqulodda va muxtor elchisi Yuy Szyun tomonidan imzolangan tabriknoma eʼlon qilindi.
Diplomatik missiya saytida yozilishicha, endilikda Xitoyning mamlakatdagi diplomatik missiyasiga Yuy Szyun boshchilik qiladi.
Ma’lumot uchun, Yuy Szyun 1972-yilda tug‘ilgan. U Xitoy Kommunistik partiyasi aʼzosi, oliy maʼlumotli. Tashqi ishlar vazirligining tegishli boshqarma va idoralarida, shuningdek, xorijdagi elchixonalar va konsulliklarda ishlagan.
Xitoyning O‘zbekistondagi avvalgi elchisi Szyan Yan joriy yilning fevral oyida besh yillik diplomatik missiyasi yakunlanganini eʼlon qilgan edi. U 2018-yildan beri mazkur lavozimda faoliyat yuritib kelayotgan edi. Undan oldin esa elchixonaga Sun Litsze rahbarlik qilgan.
Aprel oyida Shavkat Mirziyoyev favqulodda va muxtor elchilar — Falastin davlatidan Javad Avvad, Yaponiyadan Xatori Takashi, Qatar davlatidan Hasan Hamza Hoshim, Slovakiya respublikasidan Viktor Boreski va Pokiston respublikasidan Ahmad Farukning ishonch yorliqlarini qabul qilib olgan edi.
