Rossiya ketma-ket uchinchi kecha Kiyevga dronlar bilan hujum qildi. Qurbon va yaradorlar bor (foto)

13-iyulga o‘tar kechasi Rossiya Qurolli kuchlari Kiyevga kamikadze-dronlarini uchirdi. Havo hujumidan mudofaa tizimlari Ukraina poytaxti ustida “o‘nga yaqin” dronlarni urib tushirdi, ularning qoldiqlari shaharning Darnitsk, Solomensk, Shevchenkov, Obolonsk va Podolsk tumanlariga quladi, deb xabar bermoqda “UNIAN”.

Kamida to‘rt kishi yaralangan, deydi Kiyev meri Vitaliy Klichko. Uning so‘zlariga ko‘ra, Podolsk tumanidagi xonadonlardan birida dron qoldiqlari tushishi oqibatida boshlangan yong‘inda bir kishi halok bo‘lgan.

Ukraina Qurolli kuchlari Harbiy-havo kuchlari qo‘mondonligi Rossiya qo‘shinlari Ukraina hududida jami 20 ta dron va ikkita qanotli raketa uchirganini ma’lum qildi, ularning barchasi urib tushirilgan.

Rossiya qo‘shinlari ketma-ket uchinchi kecha Kiyevga uchuvchisiz uchoqlar bilan hujum qilmoqda. 11 va 12-iyul kunlari Ukraina poytaxti harbiy maʼmuriyati Kiyevda qurbonlar va vayronagarchiliklar yo‘qligi, barcha dronlar urib tushirilgani haqida xabar bergan edi.